2024 жылғы 12 қарашада ҚР Ұлттық кітапханасының Үлкен залында ҚР Мәдениет саласының үздігі, «Шалқар» радиосының журналисі Гүлмира Нәлібайдың «Өнерім - өмірім, Радиом - серігім» атты кітабының тұсаукесер рәсімі өтті.

Бұл кітапқа «Шалқар» радиосынан Г. Нәлібай жүргізген «Алтын тамыр», «Дауысыңды сағындым», «Ән жұмбақ» хабарларының мәтіндік нұсқасы енгізілген.

«Алтын тамыр» атауы бойынша қазақ этнографиясын, ұлттың болмыс-бітімін, салт-дәстүрін, әдет-ғұрпын жан-жақты түсіндіріп, «Дауысыңды сағындым» тақырыбында өмірден өтіп кеткен сан түрлі талант иелерінің өмірі мен өнері, ұлтқа сіңірген еңбектері әңгіме арқауына айналған. «Ән жұмбақ» атауы қазақтың әнші, композиторларының өнерін насихаттауға негізделген.

Кітап – жалпы оқырман қауымға, өнер зерттеушілеріне, жоғары оқу орындарының студенттеріне арналған.

Шараны модератор - белгілі ақын Талант Арғынғали жүргізді.

Шарада ҚР Ұлттық кітапханасының директоры Оспанова Бақытжамал Қайырбекқызы; ҚР Еңбек сіңірген қайраткері, әнші Мұрат Құсайынов; “Шалқар” радиосының бас редакторы Болатбек Төлепберген және қазақ радиосының ардагері, белгілі диктор Аманжан Еңсебайұлы бастаған радио қызметкерлері сөз сөйледі.

Сонымен қатар, шара аясында «Өнерім - өмірім, Радиом - серігім» атты фото көрме ұйымдастырылды.

Шараға зиялы қауым өкілдері, өнер майталмандары, “Қазақ радиосы” және “Шалқар” радиосының қызметкерлері, кітапхана оқырмандары және БАҚ өкілдері қатысты.