2024 жылғы 29 қараша, сағат 10.00-де ҚР Ұлттық кітапханасының Н. Дәулетова атындағы залында қытайдың танымал жазушысы, қандасымыз ҚХР Халықтық саяси консультативтік кеңесінің экс-депутаты, жазушы, аудармашы Ақбар Мәжиттің 70 жылдығына арналған «Еркіндік туралы ертегілер» тақырыбында халықаралық ғылыми-теориялық конференция өтеді.

Акбар Мәжит – ұлтымыздың көрнекті тұлғасы. Ол қытай тілінде қалам тербейтін бірден-бір қазақ қаламгері. Қытай астанасындағы «Қытай жазушылары» баспа тобы директорының орынбасары, «Қытай жазушылары», «Ұлттар әдебиеті» сияқты әдеби журналдардың бас редакторы болып қызмет атқарған.  Акбар Мәжиттің «Қайран он бестегі Халида-ай», «Ақсақ құлан», «Мұхаммед Пайғамбар» тәрізді шығармалары жарық көрген. Абайдың қара сөздерін, бірнеше қазақ классиктерінің шығармаларын қытай тіліне аударған 28 кітаптың авторы.

Конференция барысында атақты жазушы, телевизия, кино, баспа салаларында жауапты қызметтер атқарып келе жатқан, табиғат пен адам арасындағы тылсым байланысты, қарым-қатынасты насихаттап жүрген жазушы шығармалары өскелең ұрпақтың дүниетанымына қалай ықпалын тигізіп жүрген әсері қарастырылып, талқыланады.

Халықаралық ғылыми-теориялық конференция тақырыбының өзектілігін ескере отырып, оның жұмысына белсенді қатысуға шақырамыз.

Конференцияға отандық әрі шетелдік ғалымдар, жазушылар, мемлекеттік қызметкерлер, қоғамдық бірлестіктер және БАҚ өкілдері қатысады.