+7 (727) 267-28-83

эмблема

«Қазақстан кітаптары» қызметінің Ораз Жандосов атындағы оқу залында Алаш қозғалысының 105 жылдығына арналған «Ұлтын оятқан Ұлы тұлғалар» атты кітап көрмесі ұйымдастырылды.

Биыл еліміз Алаш қозғалысының құрылғанына 105 жыл толуын атап өтуде. Бұл қазақ халқының тарихындағы маңызды оқиға. Алаш қайраткерлері ұлттық мемлекеттіліктің  негізін қалады. Бұл қозғалыс ХХ ғасырдың басында пайда болып, қазақ халқының ұлт-азаттық күресінің шарықтау шегіне айналды. Алаш  партиясы ұлттық демократияның бастауында тұрды.

Қозғалыстың орталығы 1917 жылғы шілдеде ұйымдастырылған жалпыұлттық «Алаш» партиясы болды. Қазақ ұлттық-демократиялық интеллигенциясының көрнекті өкілдері Ә.Бөкейханов, М. Шоқай, М. Тынышпаев, М. Дулатов және басқа да ондаған қайраткерлер 1905-1917 жылдары осы алғашқы жалпыұлттық саяси ұйымды дайындау және құру үшін көп күш жұмсады. Демократ-ағартушылар қазақ қоғамының қалыптасу жолын іздеді, мемлекеттік Думадағы Мұсылман фракциясының жұмысын басқарды. Олардың бастамасымен «Айқап» журналы (1911), «Бірлік туы», «Сары-арқа», «Ақжол» газеттері құрылып, басылым беттерінде  үлкен насихат пен ағарту жұмыстары жүргізілді. Алаш қозғалысының басты мақсаты – қазақ халқының өзін-өзі басқаруын орнату және дербес мемлекет құру болды. Қозғалыстың белсенді қатысушылары Кеңес өкіметінің «ұлтшылдары» мен «халық жауларына» қарсы күресі барысында 1920-1930 жылдардың аяғында қуғын-сүргінге ұшырады. Қазақ халқының көрнекті және білімді қайраткерлерінің тұтас шоғыры жойылды.

Алашорда қайраткерлерін 1955 жылы ақтады, бірақ олар тағы отыз жыл ресми тарихтан тыс қалды. Тек 1988-1989 жылдары Қазақстан Компартиясы Орталық комитетінің шешімімен А.Байтұрсыновтың, М. Дулатовтың, Ш. Құдайбердіұлының, М. Жұмабаевтың шығармашылық мұрасы ақталды. Бірте-бірте халыққа Алаш партиясы көшбасшыларының есімдері қайтарылып, олардың шығармалары жарияланды.

«Ұлтын оятқан Ұлы тұлғалар» көрмесінде Алаш қозғалысының өкілдерін бейнелейтін энциклопедиялар, анықтамалықтар, кітаптар қойылған. Сонымен қатар, кең форматта құжаттар мен материалдар жинақтары, мерзімді баспасөз беттерінде жарияланған мақалалар қойылды.

  Кітап көрмесінің мақсаты – өмірі қазақ халқының егемендігіне арналған «Алаш» идеяларының маңыздылығын, «Алаш» қайраткерлерінің, олардың мұрагерлерінің рөлін тәуелсіз Қазақстан тұрғысынан ашу.

 Көрме көпшілік оқырманға, студент жастарға, оқытушылар мен Қазақстан тарихына қызығушылық танытатындарға арналған.

Кітап көрмесіне шақырамыз!

Сайтта

Қазір сайтта 693 қонақ отыр және бірде бір тіркелген пайдаланушы жоқ.