Ө.М. Сұлтанғазин атындағы ғалымдар залында қазақ ғалымы, географ, география ғылымдарының докторы, профессор Әлия Сәрсенқызы Бейсенованың 90 жылдығына арналған «Ұстаз. Ғалым. Қайраткер» атты кітап көрмесі ұйымдастырылды.

Әлия Сәрсенқызы Бейсенова 1932 жылы 25 наурызда Қарағанды облысы Жаңаарқа ауданының Атасу ауылында дүниеге келген. Абай атындағы Қазақ педагогикалық институтын бітірген (1954).

Ә. Бейсенова – ғалым, география ғылымдарының докторы (1984), профессор (1985), ҚР ҰҒА-ның академигі. Қазақстан Жоғары мектебінің еңбек сіңірген қайраткері (1987), ҚР Президентінің жанындағы Отбасы және әйелдер істері жөніндегі Ұлттық комиссияның мүшесі (1999). «Қазгосиздат» газетінің редакторы (1954-1959), қазақ жыртылмалы күнтізбесінің аға редакторы (1959-1960), физикалық география кафедрасының ассистенті (1963-1965), аға оқытушы (1965-1968), доцент (1968-1981), профессор (1984), кафедра меңгерушісі (1981-1991), Абай атындағы Алматы мемлекеттік университетінің география және экология факультетінің деканы. Экология кафедрасын ұйымдастырып, басқарды. Оның бастамасымен «Ландшафттар экологиясы және табиғатты қорғау» зертханасы құрылып, география және экология кафедрасы ашылды. Ә. Бейсенова алғаш рет республиканың экологиялық картасын жасады.

1967 жылы Ә. Бейсенова «Кеңес дәуіріндегі Қазақстан территориясының физикалық-географиялық зерттелуі (1917-1941 жж.)» тақырыбында кандитаттық, ал 1984 жылы «Қазақстан табиғатын зерттеу және физикалық география идеяларының дамуы» (ежелгі дәуірден 1917 жылға дейін)» тақырыбында докторлық диссертацияларын сәтті қорғады.

250 ғылыми еңбектің, оның ішінде 15 монография мен оқулықтың авторы. «Қазақстанның табиғатын зерттеу» (1982) атты алғашқы кітабы ғылыми орта мен баспасөздің оң бағасын бірден алды. Кітапта 1917-1941 жылдардағы Қазақстан аумағы физико-географиялық зерттеулерінің нәтижелері жинақталған. 1987 жылы жарық көрген «Ашыққандар» монографиясында Қазақстанды зерттеудің физико-географиялық негізін қалаған саяхатшылар мен зерттеушілер туралы айтылады.

«Ұстаз. Ғалым. Қайраткер» атты кітап көрмесінде Ә. Бейсенованың өмірі мен шығармашылығы туралы материалдар: энциклопедиялар, өмірбаяндық анықтамалықтар және ол туралы әдебиеттер көрсетілді. Әрі қарай оның ғылыми қызметі туралы материалдар: «Қазақстанның физико-географиялық зерттеулері (1917-1941 жж.)» (1982), «Қазақстан табиғатын зерттеу және физикалық география идеяларының дамуы» (1990), «Қазақстанның географиялық зерттеуінің тарихи негіздері» (2001), «Экология» (2001), «Экология – ел тағдыры» (2006), «Қазақстан табиғатының қалыптасуы мен даму тарихы» (2014), «Қазақстан географиясы» (2014), «Қазақстан елінің экологиялық ахуалы» (2018) және т.б. ұсынылды.

 Кітап көрмесіне шақырамыз!